國之將亡生妖孽 善有惡報最可悲

有人話，一個地方嘅興衰有迹可尋，真係冇講錯。好似香港咁吖，興旺嘅時候政通人和，順風順水，依家就烏煙瘴氣，七國咁亂，想唔衰落都唔得咯。究竟點解會搞成咁？咪就係因為港府施政混亂，倒行逆施囉。

港產官僚成日話法律面前人人平等，其實係吹水唔抹嘴嘅咋。呢，《太陽報》年前有篇評論文章為弱勢社群抱打不平，批評當局對殘疾人士照顧不足，點知好心冇好報，有位H指該文章涉及殘疾歧視，透過平機會提出訴訟，結果被判敗訴；舊年佢又不滿《太陽報》就案件進行跟進報道及評論，再次引用《殘疾歧視條例》自行興訟，指《太陽報》「中傷」精神病患者喎，卒之又敗訴。

好嘞，有人一再妄告傳媒，誰是誰非已經清清楚楚，但法庭居然下令與訟雙方各自負擔訟費，《太陽報》贏官司反而變相受罰，簡直匪夷所思。你話喇，呢啲究竟係乜嘢法律呢？法律本應用嚟主持公義，儆惡懲奸，家陣居然畀人用作針對傳媒，係又告，唔係又告，咁仲成世界嘅？

正如法律界人士話齋，如果有人利用《殘疾歧視條例》不顧後果提出訴訟，即使被告勝訴亦需付上大筆訟費，法庭並且容許原告不公開姓名及身份，明顯存在法律漏洞。冇錯喇，相關條例漏洞多多，唔止保障唔到殘疾人士，而且淪為打壓新聞自由嘅工具，簡直添煩添亂。咁多年來，東方報業集團多次被人以《殘疾歧視條例》枉告，為咗討回公道，每次都要耗費大量人力物力財力，雖然最終贏咗官司，卻要支付數以十萬甚至過百萬元律師費，可謂冤哉枉也。

善有惡報，惡有善報，香港淪為是非不分、黑白顛倒嘅社會，唔沉淪至奇喇。即係咁，有人利用法律漏洞針對傳媒固然可恥，而平機會助紂為虐同樣可鄙，至於司法機構來者不拒，更加令人莫名其妙。有人指香港司法獨大，一啲都冇誇張。

所以話，國之將亡，必有妖孽，香港沉淪唔係冇原因。就以最近嚟講，政府有政府亂，立法會有立法會亂，搞到嘈喧巴閉，永無寧日，乜嘢正經事都做唔到，香港點可能有運行吖。反對派聲稱七一遊行有五十一萬人參加，其實家陣管治咁亂，問題咁多，民怨咁大，話五十五萬人上街都得喇，下次隨時過百萬人添吖。嗱，佔中行動就快正式上演，計功夫茶話齋，除咗爭取普選之外，應該增加其他民生議題，咁先至更加出師有名，更加可以凝聚民心吖嘛。總而言之，不在沉默中爆發，就在沉默中滅亡，香港係時候改變喇，祝各位成功！/東方日報